Breaking News
Home / Lifestyle / ക്ഷമിക്കണം പൃഥ്വി, നിങ്ങൾ നിരാശപ്പെടുത്തി ഒരു മോഹൻലാൽ ആരാധകന്റെ കുറിപ്പ്

ക്ഷമിക്കണം പൃഥ്വി, നിങ്ങൾ നിരാശപ്പെടുത്തി ഒരു മോഹൻലാൽ ആരാധകന്റെ കുറിപ്പ്

റിലീസ് ചെയ്ത തിയറ്ററുകളില്‍ എല്ലാം നിറഞ്ഞ സദസ്സില്‍ വിജയകരമായി ബ്ലോക്ക്‌ബസ്റ്റര്‍ സ്റ്റാറ്റസ് നേടികൊണ്ട് കുതിക്കുന്ന ലുസിഫര്‍ ഒരുപാട് പേര്‍ക്ക് ഏറ്റവും മികച്ച തിയറ്റര്‍ അനുഭവമാണ് നല്‍കുന്നത്. പ്രധാനമായും ആരാധകര്‍ക്ക് അവരുടെ പ്രിയപ്പെട്ട ലാലേട്ടനെ തകര്‍പ്പന്‍ മാസ്സ് സിനിമയിലൂടെ തിരിച്ചുകിട്ടി എന്ന സന്തോഷത്തിലാണ്. ബോക്സ്‌ ഓഫീസിലടക്കം റെക്കോർഡുകൾ തീർത്ത് ചിത്രം മുന്നേറുകയാണ്.

ലൂസിഫർ റിലീസ് ആയി ദിവസങ്ങൾ കഴിയുന്ന ഈ സാഹചര്യത്തില്‍ ചില വ്യക്തമായ വിമര്‍ശന റിവ്യൂകളും ലുസിഫറിനു കിട്ടുന്നുണ്ട്‌. ഇതിൽ ഒരു പഴയ മോഹൻലാൽ ആരാധകന്റെ റിവ്യൂ ആണ് ഏറെ വ്യക്തതയുള്ള വിമർശനമായി ശ്രദ്ധ നേടുന്നത്. അദ്ദേഹത്തിന്റെ പേര് RJ സലിം എന്നാണ്. അദ്ദേഹത്തിന്റെ സോഷ്യൽ മീഡിയ പോസ്റ്റിലൂടെ അദ്ദേഹം ചില ആരോഗ്യപരമായ വിമർശനങ്ങൾ മുന്നോട്ട് വയ്ക്കുന്നു.

RJ സലീമിന്റെ പോസ്റ്റ്‌ വായിക്കാം..


പ്രിയപ്പെട്ട പൃഥ്വിരാജ് അറിയാൻ, ഒരു പഴയ മോഹൻലാൽ ഫാൻ (ചുരുക്കി) എഴുതുന്നത്

1. താങ്കളുടെ സിനിമകൾ കണ്ടല്ലാതെ താങ്കളുടെ അഭിമുഖങ്ങൾ കണ്ടു താങ്കളിൽ പ്രതീക്ഷ തോന്നിപ്പോയൊരാളാണ്. അഭിമുഖങ്ങളിൽ താങ്കൾ പ്രകടിപ്പിക്കുന്ന വൈഭവം മിക്കവാറും താങ്കളുടെ സിനിമകളിൽ കാണാറില്ല. പക്ഷെ ആ വൈഭവത്തിൽ വീണുപോയി. സിനിമയിൽ സ്ത്രീ വിരുദ്ധതയുടെ ഭാഗമാകില്ല എന്ന് ഉറക്കെ പ്രഖ്യാപിച്ച താങ്കളുടെ ആദ്യ സിനിമയിൽ തന്നെ മെയിൽ ഗെയ്‌സിന്റെ അയ്യരുകളിയാണ്. എത്ര തവണയാണ് ക്യാമറ സ്ത്രീയെ വോയറൈസ് ചെയ്യുന്നതെന്ന് എണ്ണിയെടുക്കാൻ പോലും സാധിക്കില്ല. ഏറ്റവും ഒടുവിലത്തെ ഐറ്റം സോങ് അതിന്റെ പീക്കായിരുന്നു. നരേഷനിലോ പ്ലോട്ടിലോ ഒരുവിധത്തിലും റെലെവന്റല്ലാത്ത വെറും ശബ്ദ മലിനീകരണമായിരുന്നു ആ പാട്ട്. .

2. വെറും സംഭാഷണം മാത്രമല്ല സിനിമയിൽ സ്ത്രീവിരുദ്ധമായി ഉള്ളതെന്ന് താങ്കൾ മനസ്സിലാക്കണം. അതല്ല ഫാൻസിനു വേണ്ടി നിലപാടിൽ വെള്ളം ചേർത്തതാണെങ്കിൽ അത് അതിലും വലിയ വഞ്ചനയാണ്. രണ്ടായാലും ഇക്കാര്യത്തിൽ താങ്കൾ അങ്ങേയറ്റം നിരാശപ്പെടുത്തിയിരിക്കുന്നു എന്ന് പറയുന്നതിൽ വിഷമമുണ്ട്. ഇനി താങ്കളുടെ പറച്ചിലുകൾ വിശ്വസിക്കാതിരിക്കാൻ ശ്രമിക്കാം. താങ്കൾക്ക് പൂർണ്ണ നിയന്ത്രണമുള്ള താങ്കൾ സംവിധാനം ചെയ്ത സിനിമയിൽ പാലിക്കാത്ത വാക്കൊന്നും താങ്കൾ അഭിനയിക്കുക മാത്രം ചെയ്യുന്ന സിനിമയിൽ പാലിക്കുമെന്ന് പ്രതീക്ഷിക്കുന്നതിൽ അർത്ഥമില്ലല്ലോ. .

3. സിനിമയിലെ ഏറ്റവും അണ്ടർ റിട്ടൺ കഥാപാത്രമാണ് സ്റ്റീഫൻ നെടുമ്പള്ളി. സ്റ്റീഫൻ നെടുമ്പള്ളിക്ക് മോഹൻലാലിൻറെ താര ശക്തി എന്നതിൽ കവിഞ്ഞൊരു നിലനിൽപ്പ് തന്നെയില്ല. അതിനേക്കാൾ നന്നായി വിവേക് ഒബിറോയിയുടെ ബിമൽ നായർ എന്ന കഥാപാത്രത്തിന് കാമ്പുണ്ട്. മോഹൻലാലിൻറെ സ്‌ക്രീൻ ടൈം തന്നെ എത്രയോ കുറവാണ്. ആദ്യം തോന്നിപ്പിച്ച മെച്ചപ്പെട്ട പ്രെമൈസ് ഒക്കെ പിന്നീട് എങ്ങോ പോയി മറഞ്ഞു. സത്യമായിട്ടും പരമാവധി ആസ്വദിക്കാൻ ശ്രമിച്ചിട്ടും പരാജയപ്പെട്ടുപോയൊരു സിനിമയായിരുന്നു ലൂസിഫർ. .

4. ഉസ്താദ്, താന്തോന്നി എന്നിവയെ തൽക്കാലം വിട്ടുകളയാം. പക്ഷെ സാഗർ ഏലിയാസ് ജാക്കി റീലോഡഡ് താങ്കൾ ഇതുവരെ കണ്ടിട്ടില്ലെങ്കിൽ അതൊന്നു കണ്ടു നോക്കണം. എന്നിട്ടു പറയണം മുരളി ഗോപി അതിൽ നിന്ന് കാര്യമായ എന്ത് വ്യത്യാസമാണ് ലൂസിഫറിൽ കൊണ്ട് വന്നതെന്ന്. മോഹൻലാലിൻറെ പഴയ കഥാപാത്രങ്ങളുടെ പുവർ റെഫെറെൻസും ഹാങ്ങോവറും കൊണ്ട് കൈയ്യടി നേടാൻ നോക്കുന്നത് സ്വന്തമായി എന്തെങ്കിലും ചെയ്യാൻ പറ്റാത്തതുകൊണ്ടോ അതിനുള്ള മടി കൊണ്ടോ ആണ്. സിനിമ അതിന്റെ സ്വന്തം ബലത്തിൽ ഒരിടത്തും മോഹൻലാലെന്ന് താരത്തിനെയോ നടനെയോ അപ്‌ഹോൾഡ് ചെയ്യുന്നില്ല. .

5. മാസ് സിനിമകൾ ഷാജി കൈലാസ് സിനിമകളുടെ കാലഘട്ടത്തിൽ നിന്ന് ഒരുപാടു മുന്നോട്ടുപോയ കാര്യം താങ്കളെ അറിയിക്കട്ടെ. ഒടുവിലൊടുവിലെ ഷാജി കൈലാസ് സിനിമകളിൽ സ്ക്രിപ്റ്റിലെ കുറവുകൾ നികത്താനും പവർ സീനുകൾ നൽകാനും വെറും ക്യാമറ കറക്കലിനെയും സ്റ്റാർ പവറിനെയും ആശ്രയിച്ച മൂന്നാംകിട സിനിമകളായിരുന്നു. അതൊക്കെ തന്നെ ഇവിടെയും കാണാനാകുന്നു. സ്വാധീനിക്കപ്പെടണമെങ്കിൽ തന്നെ ഷാജി കൈലാസിന്റെ വർക്കായ മാസ് സിനിമകൾ തിരഞ്ഞെടുക്കാമായിരുന്നല്ലോ. .

6. മുരളി ഗോപി താങ്കളെ എന്ത് പറഞ്ഞാണ് കൺവിൻസ്‌ ചെയ്യിച്ചത് എന്നറിയില്ല, പക്ഷെ അതൊന്നും സ്ക്രിപ്റ്റിലോ സ്‌ക്രീനിലോ വന്നിട്ടില്ലെന്ന് അങ്ങേയറ്റം ഖേദത്തോടെ പറയട്ടെ. ലൂസിഫർ എന്ന പേരുപോലും സാധൂകരിക്കാത്ത തരം എഴുത്താണ് എന്ന് പറയേണ്ടി വരുന്നതിൽ ദുഖമുണ്ട്. അതിനായി അങ്ങിങ്ങു എന്തിനോ വേണ്ടിപ്പറയുന്ന ബൈബിൾ വചനങ്ങളൊക്കെ മാസിനെക്കാൾ മടുപ്പാണ് ഉണ്ടാക്കുന്നത്. .

7. ആക്ഷൻ സീക്വൻസുകളിൽ കോഹെറൻസ് ഒരു വലിയ ഘടകമാണ് എന്ന് താങ്കൾക്ക് അറിയാമെന്നു കരുതട്ടെ. എന്നാൽ മാത്രമാണ് അതിനൊരു ഇമ്പാക്റ്റ് ഉണ്ടാകുന്നത്. ലൂസിഫറിലെ ഒരൊറ്റ ആക്ഷൻ സീക്വൻസ് പോലും പ്രോപ്പർലി കട്ട് ആയി തോന്നിയില്ല. ഒരു പഞ്ചിനു പതിനഞ്ചു കട്ട് ഇടുന്നത് ഇമ്പാക്റ്റ് പത്തിലൊന്നായി കുറയ്ക്കും. ഇവിടെ ഓരോ പഞ്ചും ഊഹിച്ചെടുക്കേണ്ട അവസ്ഥയാണ്. അതും മോഹൻലാലിനെപ്പോലെ ആക്ഷൻ വൃത്തിയായി കൈകാര്യം ചെയ്യുന്നൊരാളെവെച്ചാണ് ഇത് ചെയ്തതെന്നോർക്കണം. .

8. മുരളി ഗോപിയോട് പറയണം നമ്മൾ ബൈബിൾ ക്ലാസ്സിൽ പോകാൻ താൽപ്പര്യപ്പെടുമ്പോൾ വല്ല പള്ളിയിലും പൊക്കോളാമെന്നു. അതിനു വേണ്ടി എന്തായാലും കാശു കൊടുത്തു തീയറ്ററിൽ വരില്ല എന്ന്. അസംബന്ധ സംഭാഷണങ്ങളുടെ സൂപ്പർമാർക്കെട്ടായിരുന്നു സിനിമ. ഒരു ചായ വേണമെങ്കിലും നാല് വാചകം ഗ്യാസ് തത്വം പറയണമെന്ന് വെച്ചാൽ കേട്ടിരിക്കാൻ വലിയ കഷ്ടമാണ്. .

9. മോഹൻലാലെന്ന് താരത്തിന്റെ (അഭിനേതാവിനെ കൺസിഡർ പോലും ചെയ്തിട്ടില്ല) ഏറ്റവും ചെറി ടോപ്പിലെ അംശങ്ങൾ അതേപടി ഉപയോഗിച്ചിട്ടുള്ളതല്ലാതെ അദ്ദേഹത്തിന്റെ മറ്റെന്തു പാടവമാണ് ഇതിൽ ഉപയോഗിച്ചിരുന്നതെന്നു വ്യക്തമാക്കിയാൽ നന്നായിരുന്നു. ഇതേ രീതിയാണ് ഒരുപക്ഷെ മോഹൻലാലിൻറെ എല്ലാ മാസ് സിനിമയും പിന്തുടർന്നിരുന്നത് എങ്കിൽ മോഹൻലാലെന്ന് താരം തന്നെ ഇന്ന് കാണുമായിരുന്നില്ല. .

10. ഏറ്റവും പ്രധാനപ്പെട്ട കാര്യം. ഈ സിനിമയിൽ ഡ്രാമ എന്നൊരു സാധനം എവിടെയുമില്ല എന്നതാണ്. കഥാപാത്രങ്ങൾ കരയുമ്പോൾ പ്രേക്ഷകർ നിർവികാരരായി ഇരിക്കുന്നതൊക്കെ പ്രേക്ഷകരെ കഥാപാത്രങ്ങളോട് അടുപ്പിക്കുന്ന വിധമുള്ളൊരു ഡ്രാമ സെറ്റ് അപ് ബിൽഡ് ചെയ്യുന്നതിൽ സിനിമ പരാജയപ്പെട്ടതുകൊണ്ടാണ്. നിങ്ങളെന്തു മാസ് കാണിച്ചാലും അതെല്ലാം ബിൽഡ് ചെയ്യേണ്ടത് ഡ്രാമയുടെ പുറത്താണ്. അങ്ങനെയാണ് ഇമോഷൻ ഉണ്ടാകുന്നത്. ലൂസിഫർ അതിൽ ശരാശരിക്ക് പോലും വിജയിക്കുന്നില്ല.

മുരളി ഗോപി വെറും ഷാലോ ആയ സ്ക്രിപ്റ്റാണ് നൽകിയത് എന്ന് താങ്കൾ മനസിലാക്കാതെപോയതിൽ അത്ഭുതമുണ്ട്. എന്തോ മനസ്സിലിട്ടു അങ്ങോട്ടും ഇങ്ങോട്ടും കൂർപ്പിച്ചു നോക്കി നടക്കുന്ന ഒരാളാണ് സ്റ്റീഫൻ നെടുമ്പള്ളി എന്നതിൽ കവിഞ്ഞു അയാൾക്കൊരു ഡെപ്തും പർപ്പസും സിനിമ നൽകുന്നില്ല. സിനിമയുടെ പ്രമോഷനിൽ താങ്കളും സഹപ്രവർത്തകരും അവകാശപ്പെട്ട ലെയറുകൾ എവിടെ മിസ്സായെന്ന് താങ്കൾ അന്വേഷിക്കണം. .

പറയാനൊരുപാടുണ്ട്. താങ്കൾ ഒരു മുഖ്യധാരാ മാസ് സിനിമ എടുത്തത് മനസ്സാലെ അംഗീകരിച്ചിട്ടു തന്നെയാണ് സിനിമയ്ക്ക് കയറിയത്. പക്ഷെ ക്ഷമിക്കണം പ്രിത്വി, നിങ്ങൾ നിരാശപ്പെടുത്തുകയാണുണ്ടായത്. മോഹൻലാലിനെ ഇഷ്ടപ്പെടുന്നൊരാളെന്ന നിലയിൽപ്പോലും ലൂസിഫർ ഒരു ശരാശരി അനുഭവം പോലും സമ്മാനിക്കാതെ കടന്നുപോയി.

അടുത്ത തവണ കുറേക്കൂടി ശ്രദ്ധയും കരുതലും ആശംസിക്കുന്നു. തീയേറ്ററിലെ ഫാൻസ്‌ യൂഫോറിയ കെട്ടടങ്ങിക്കഴിയുമ്പോൾ സിനിമയുടെ ശരിയായ അഭിപ്രായങ്ങൾ വന്നു തുടങ്ങും. അന്ന് മേൽപ്പറഞ്ഞതിൽ എന്തെങ്കിലും കാര്യമുണ്ടോ ഇല്ലയോ എന്ന് താങ്കൾക്ക് മനസ്സിലാകുമായിരിക്കും.

അപ്പൊ ശരി.

About Intensive Promo

Leave a Reply

Your email address will not be published.