ലോൺ എടുത്തു പഠിപ്പിച്ച സ്വന്തം അപ്പനും അമ്മയ്ക്കും മരുന്നിനു പോലും കൊടുക്കാൻ പറ്റുന്നില്ല. അതൊക്കെ ആൺമക്കളുടെ കടമയത്രേ

വീട്ടിലെയും ഓഫിസിലെയും കാര്യങ്ങൾ തികഞ്ഞ ഉത്തരവാദിത്വത്തോടെ ചെയ്യുന്നവരാണ് ഇന്നത്തെ കാലത്തെ സ്ത്രീകൾ. എങ്കിലും കുടുംബത്തിൽ നിന്നും സുഹൃത്തുക്കളിൽ നിന്നും അവർ അനുഭവിക്കുന്ന മാനസിക പ്രശ്നങ്ങളും ചെറുതല്ല. ഉദ്യോഗസ്ഥകളായ വീട്ടമ്മമാർ കുടുംബത്തിലും പുറത്തും അനുഭവിക്കുന്ന പ്രശ്നങ്ങൾ ഫെയ്സ്ബുക് കുറിപ്പിലൂടെ പങ്കുവയ്ക്കുകയാണ് കൗൺസിലിങ് സൈക്കോളജിസ്റ്റായ കല മോഹൻ.

കല മോഹൻ എഴുതിയ കുറിപ്പ് വായിക്കാം;

അടുത്ത സ്നേഹിത അവൾക്കുണ്ടായ അനുഭവം പറയുക ആയിരുന്നു.. ജോലി ചെയ്തു ക്ഷീണിച്ചെത്തിയ അവളോട് ഭർത്താവ് പറയുക ആണ് , കൂട്ടുകാരനും ഭാര്യയും അടുത്തുള്ള ഒരു പഞ്ചനക്ഷത്ര ഹോട്ടലിൽ എത്തിയിട്ടുണ്ട്.. ഒന്നിച്ചു ഭക്ഷണം കഴിക്കാൻ വിളിച്ചു. ശരി , ഞാൻ ഒന്നു ഫ്രഷ് ആയിട്ട് വരാമെന്നു അവൾ.. ഓ, അതൊന്നും വേണ്ട.. അവർ കാത്തിരിക്കും , വേഗം വരൂ എന്ന് പറഞ്ഞു പെട്ടന്ന് തന്നെ ഹോട്ടലിൽ എത്തി.. ശ്ശോ,എങ്കിലും ഞാൻ ഒന്ന് ഫ്രഷ് ആകാമായിരുന്നു… രണ്ടു ബസ്സു കേറി പോകുകയും വരികയും ചെയ്യുന്നവളാണ്.. ആകെ മുഷിഞ്ഞു.. അവൾ പിന്നെയും മനസ്സിൽ ഓർത്തു..

ചുറ്റും കൂടി തമാശ ഒക്കെ പറഞ്ഞു ഭക്ഷണം കഴിക്കവേ കൂട്ടുകാരനറെ ഭാര്യ കുശലം ചോദിച്ചു തുടങ്ങി. എവിടെയാ ഇപ്പോൾ ജോലി. ജോലി ചെയ്യുന്ന സ്ഥലവും മറ്റു കാര്യങ്ങളും ഒക്കെ കേട്ടിട്ട്, അവസാനം അവരുടെ വക ഒരു കമന്റ്. ഭർത്താവ് നന്നായി അധ്വാനിക്കുന്നില്ലേ. ഇതിന്റെ ഒക്കെ വല്ല കാര്യോമുണ്ടോ..? ക്ഷീണിച്ചു കോലം കേട്ടല്ലോ..!! ആ വാക്കുകളിലെ പുച്‌ഛം സഹിക്കാൻ വയ്യ.

പതിനായിരം റുപ്പിക കൊടുത്തു ബ്യൂട്ടി പാര്ലറില് പോയി മിനുക്കിയ സ്വന്തം രൂപത്തെ പറ്റി ഇടയ്ക്കിടയ്ക്ക് പൊങ്ങച്ചം പറയുകയും ചെയ്യുന്നുണ്ട്.. കൊച്ചുങ്ങളെ പഠിപ്പിക്കുക. സ്കൂളിൽ കൊണ്ട് പോകുക. ഭർത്താവിന്റെ ആരോഗ്യത്തിന് വേണ്ടി പ്രാർത്ഥിക്കുക. കാശൊക്കെ അതിയാൻ ഉണ്ടാകുമല്ലോ. വീട്ടുജോലിക്കു ആളുമുണ്ട്..! സ്വന്തം കാര്യം വീർപ്പിച്ചു കെട്ടി പറയുന്നതിന്റെ ഇടയ്ക്കു പിന്നെയും.. എന്നാലും വല്ല കാര്യോം ഉണ്ടോ.. ഈ ജോലിക്കു പോയി ആരോഗ്യം കളയേണ്ട..! ആ സ്ത്രീയോടുള്ള അമർഷം മുഴുവൻ സ്നേഹിത പറഞ്ഞു തീർത്തു..

ഭർത്താവിന്റെ സ്വന്തം ആളുകളാണ്. തറുതല പറഞ്ഞാൽ വീടിനു പുറത്താണ്. കിട്ടുന്ന ശമ്പളം മുഴുവൻ വാങ്ങി കയ്യിൽ വയ്ക്കുന്ന ഭർത്താവ് ഇതൊക്കെ കേട്ടിട്ട്, നിസ്സാരമായി ചിരിച്ചു ഇരിക്കുന്നതല്ലാതെ ഒന്നും പറയുന്നില്ല. അതാണ് ഏറ്റവും നൊന്തത്.. എന്തൊരു കോലമാണ്. വീട്ടുകാര്യം നോക്കാതെ ഇങ്ങനെ കഷ്‌ടപെടണോ?? ഒറ്റ പുരുഷൻ പോലും ഈ ചോദ്യം സത്യത്തിൽ ചോദിക്കാറില്ല.. അതാണ് ആശ്വാസം…

സ്ത്രീകളായ കൂട്ടുകാരോട് ചോദിച്ചോട്ടെ. സത്യത്തിൽ എന്തിനാണ് നമ്മൾ ജോലിക്കു പോകുന്നത്..? വെറും സാമ്പത്തിക ലാഭം മാത്രമാണോ ലക്‌ഷ്യം..? കൂടെ ജോലി ചെയ്യുന്ന സഹപ്രവർത്തകരിൽ ചിലർ സ്വന്തം വീട്ടിൽ , അച്ഛനോ അമ്മയ്ക്കോ സഹോദരങ്ങൾക്കോ ഒരൽപം സഹായം ചെയ്യാൻ കഴിയുന്നില്ല എന്ന് സങ്കടം പറയാറുണ്ട്.. കിട്ടുന്ന ക്യാഷ് അപ്പാടെ കെട്ട്യോനെ കണക്കു സഹിതം ഏൽപ്പിക്കും , പിന്നെ സ്വന്തം വീട്ടിൽ കൊടുക്കുന്ന കാര്യം ചോദിക്കാൻ പോലും ഭയം..!

വർഷങ്ങൾ വിദേശത്ത് ജോലി നോക്കിയിട്ടും സ്വന്തമായി ഒന്നും ഉണ്ടാക്കാൻ ഇന്നേ വരെ കഴിഞ്ഞിട്ടില്ല എന്ന് കരയുന്ന എത്രയോ പെണ്ണുങ്ങൾ.. ഭർത്താവിന് അയച്ചു കൊടുക്കുന്ന കാശ് അദ്ദേഹം കൈകാര്യം ചെയ്യും. ലോൺ എടുത്തു പഠിപ്പിച്ച സ്വന്തം അപ്പനും അമ്മയ്ക്കും മരുന്നിനു പോലും കൊടുക്കാൻ പറ്റുന്നില്ല.. അതൊക്കെ ആൺ മക്കളുടെ കടമ അത്രേ. സഹോദരിക്കും ഭർത്താവിനും മക്കൾക്കും, സഹോദരൻ സമ്മാനം കൊടുക്കണം. അമ്മാവന്റെ, സഹോദരന്റെ, അളിയന്റെ കടമ.. പക്ഷെ, സഹോദരി കൊടുക്കില്ല.. കാരണം അതിനു ഭർത്താവു സമ്മതിക്കില്ല..

തൊട്ടുമുന്നിൽ തന്നെ പല ജീവിതങ്ങൾ ഉണ്ട്.. കൂടെ പഠിച്ചവർ..ബന്ധങ്ങളിൽ ഉള്ളവർ.. ഉഴപ്പി നടന്ന പലരും ഉന്നത സ്ഥാനങ്ങൾ അലങ്കരിക്കുമ്പോഴും റാങ്കും ഗോൾഡ് മെഡലും ഒക്കെ പെട്ടിയിൽ വച്ച് ഉദ്യോഗമേ വേണ്ട എന്ന് തീരുമാനിച്ചു ജീവിക്കുന്നവർ.. ഉത്തരം ഒന്നേയുള്ളു.. ഭർത്താവിന് നല്ല വരുമാനം ഉണ്ട്. പഠിപ്പുള്ള പെൺകുട്ടിയെ വിവാഹം കഴിച്ചത്, ഉണ്ടാകുന്ന പിള്ളേരെ പഠിപ്പിക്കാൻ…!!! വിവാഹം കഴിഞ്ഞു ആ പത്രാസൊന്നും വേണ്ട..!! ശരി.. സന്തോഷം.. നിങ്ങളായി നിങ്ങളുടെ പാടായി…!! പക്ഷെ, ഉദ്യോഗം ആഗ്രഹിക്കുന്നവർ ഒക്കെ സമ്പാദിച്ചു കൂട്ടാൻ വേണ്ടി എന്ന് കരുതരുത്.. വീട്ടമ്മ എന്ന പദവി വളരെ വളരെ വലുതാണ്.

അതേ പോലെ തന്നെ മഹത്വം ആണ് ഉദ്യോഗസ്ഥർ ആയ വീട്ടമ്മമാരുടെയും നില.. ആഗ്രഹമുള്ള ജോലി തിരഞ്ഞെടുക്കാനും അത് ആസ്വദിക്കാനും ഉള്ള അവകാശം എല്ലാവര്ക്കും ഉണ്ട്.. ഇനിയത്തെ കാലത്ത് രണ്ടു മക്കൾ ഉള്ളവർ മൂന്ന് എന്ന് കരുതുക.. ഒന്ന് ഉള്ളവർ രണ്ടു എന്ന് കരുതുക.. ഇതൊരു കരുതൽ ആണ്… ഒരു പരിധി വിട്ടു ആരും ആർക്കും ഭാരമാകാതിരിക്കാൻ.. അതുപോലെ, നാളെത്തേയ്ക്കുള്ള സ്വപ്നത്തിനു സഹായകമാകാൻ… രോഗങ്ങളെ അതിജീവിക്കാൻ… അല്ലെങ്കിൽ കടമ നിർവഹിക്കാൻ..

അതിനെക്കാൾ ഉപരിയായി, ഒന്നിച്ചു ജീവിതം തുടങ്ങിയ പങ്കാളി പുതിയ മേച്ചിൽപുറം തേടി പോയാൽ, മരണത്തെക്കാൾ, ഭയാനകമായ ആ അപമാനത്തെ ഒരു ശതമാനം സ്ത്രീകൾ എങ്കിലും നേരിടേണ്ട അവസ്ഥ വന്നാൽ, ഒരു ജോലി എന്നത് പ്രാണവായു ആണ്….. ജീവിതത്തിൽ ഒറ്റപെട്ടു പോകുമ്പോൾ സ്വന്തമായി ഒരു ജോലി എങ്കിലും ഉണ്ടെങ്കിൽ എത്ര നന്നാണ്… എന്ത് ഭാരപ്പെട്ട വീട്ടുജോലി ആണെങ്കിൽ കൂടി, ഇപ്പോൾ, അതൊക്കെ എളുപ്പമാക്കാൻ പറ്റുന്ന മാർഗ്ഗങ്ങൾ ഉണ്ട്..

ഒരുപാട് സമയം അധികം കിട്ടുമ്പോൾ, പഠിച്ചത് വെറുതെ ആയല്ലോ, ജോലിക്ക് പോകാൻ ആകുന്നില്ല എന്ന സങ്കടം തീവ്രമാകും… മറ്റുള്ളവരെ പോൽ തനിക്കു ആകുന്നില്ലല്ലോ എന്ന ചിന്ത, അതിൽ നിന്ന് ഉണ്ടാകുന്ന സ്ത്രീകളുടെ സ്ട്രസ്സ്, എത്ര വലുതാണെന്ന് പല കേസുകളിൽ കാണാറും ഉണ്ട്… കുഞ്ഞുങ്ങൾ ഒരു വിധം പ്രായമാകുമ്പോൾ എങ്കിലും ഒരു ജോലിക്ക് പോകാൻ കഴിയണേ എന്ന് പ്രാർത്ഥനയോടെ ഇരിക്കുന്ന ഒരുപാട് സ്ത്രീകളുടെ മനസ്സറിയാം…